Al-Iklas 1 - Nashoih

يا عِبَادِي إني حَرَّمْتُ الظُّلْمَ على نَفْسِي وَجَعَلْتُهُ بَيْنَكُمْ مُحَرَّمًا فلا تَظَالَمُوا،

Gusti, dlolim diharamkeun

Jail kaniaya ka kulawarga, ka baraya, ka tatangga.

Paparinan abdi, taufik sareng hidayah sangkan abdi teu tiba kana dlolim.

يا عِبَادِي كُلُّكُمْ ضَالٌّ إلاَّ من هَدَيْتُهُ فاسْتَهْدُوْنى أَهْدِكُمْ،

Mangsa diri migawe tho'at,
Atanapi ninggal batur cariwera jeng lalawora dina katho'atan,

bahkan boa tiba tina maksiat,
Dina rasa datang ujug-ujug
Asa aing pang tho'atna
Asa aing pang sholehna,

Gerenteskeun, harewoskeun.... soanten lirih ukur kadangu ku diri nyalira,

Gusti, tho'at abdi, sholeh abdi

upami sanes hidayah Gusti,

tanwande abdi aya dina kasesatan,

Nuhun Gusti, Salira ku Anjeun parantos maparin hidayah.

Gusti nu Agung,

Mugia tambih-tambih hidayahna abdi. Amin.

يا عِبَادِي كُلُّكُمْ جَائِعٌ إلاّ من أَطْعَمْتُهُ فاسْتَطْعِمُونى أُطْعِمْكُمْ،

Mangsa diri ruang-riung

mayor, botram, balakecrakan,

make bet ninggal batur sahandapeun,

sorangan daging, batur mah asin.

sorangan endong, batur mah uyah.

Dina rasa datang ujug-ujug
Asa aing pang beungharna,
Asa aing pang kewesna,

Gerenteskeun, harewoskeun.... soanten lirih ukur kadangu ku diri nyalira,

Gusti, beungharna abdi, kewesna abdi,

Waregna abdi ku katuangan,

Upami sanes paparin Gusti,

Tanwande abdi aya dina kalaparan.

Nuhun Gusti, Salira ku Anjeun parantos maparin katuangan.

Gusti nu Agung,

Mugia tambih-tambih kabeungharan abdi, kamucekilan abdi. Amin.

يا عِبَادِي كُلُّكُمْ عَارٍ إلاّ من كَسَوْتُهُ فاسْتَكْسُونى أَكْسُكُمْ،

Mangsa diri masamoan

ruang riung, kukumpulan

make bet ninggal batur sahandapeun,

sorangan raksukan ginding,

nu sanes mah katinggal bucin,

sorangan asa gagah nganggo jas

nu sanes rudin asa teu merenah

Dina rasa datang ujug-ujug
Asa aing pang gagahna,
Asa aing pang hadena,

Gerenteskeun, harewoskeun.... soanten lirih ukur kadangu ku diri nyalira,

Gusti, gagahna abdi, 

Sareng saena raksukan

Upami sanes paparin Gusti,

Tanwande abdi sitataranjang, buligir, bucin.

Nuhun Gusti, Salira ku Anjeun parantos maparin abdi pangangge anu hade.

Gusti nu Agung,

Mugia tambih kagandangan-kagindingan abdi,

dipoles akhlak nu mangrupi taufik Gusti.

يا عِبَادِي إِنَّكُمْ تُخْطِئُونَ بِاللَّيْلِ وَالنَّهَارِ وأنا أَغْفِرُ الذُّنُوبَ جميعا فاسْتَغْفِرونى أَغْفِرْ لَكُمْ

Mangsa diri milampah hirup

keupat eundang ngagandeang

kukumpulan jeung nyorangan

make bet ninggal diri asa suci,

teu gaduh dosa, teu gaduh lepat

Dina rasa datang ujug-ujug

Asa aing pang sucina,
Asa aing pang teu boga dosana,

Gerenteskeun, harewoskeun.... soanten lirih ukur kadangu ku diri nyalira,

Gusti, sumpingna siang sinareng wengi, 

Diri make bet ngaraos suci.

Mugia Gusti ngahapunten abdi,

boa aya dosa nu nyampak.

nu teu karaos nempelna awak

Gusti nu Agung,

Salira ku Anjeun nu ngahapunten sadaya dosa

Abdi istighfar neda hapunten,

Boh bilih dosa seueur teu kinten.

استغفر الله العظيم

====